Buldhana Hair Fall: सध्या महाराष्ट्रात बुलढाण्यातली एक प्रकरण प्रचंड गाजतंय, ते म्हणजे बुलढाण्याच्या शेगावमधल्या काही गावांमध्ये लहान मुलांपासून ते वृद्धांपर्यंत सगळ्यांचे केस मागच्या काही दिवसांपासून अचानक गळायला सुरूवात झाली. या केस गळतीमध्ये तर अगदी लहान मुलांनाही टक्कल पडलं. त्यामुळे सध्या हे प्रकरण संपूर्ण महाराष्ट्रात चर्चेत आहे. सर्व गावकऱ्यांची ही केसगळती नेमकी कशामुळे होतेय यावर वेगवेगळे कारणे सांगितले गेले. यात काहींनी शाम्पू वापरल्याने टक्कल पाडत असेल असं म्हटलं तर काहींनी हा एखादा व्हायरस असावा असं म्हटलं. पण यात आश्चर्य म्हणजे ज्या लोकांनी अजून पर्यंत कधीही शाम्पू वापरला नाही अशा लोकांना सुद्धा टक्कल पडत आहे.
केस गळतीने गावकरी परेशान
केस हे कोणत्याही व्यक्तीच्या व्यक्तीमत्वाचा प्रमुख भाग असतात. टक्कल पडल्यामुळे अनेकदा अनेकांना हेटाळणीही सहन करावी लागतो. अशातच बुलढाण्याच्या शेगावमधल्या काही गावांत अकाली केस गळू लागल्याने नागरिक चिंतेत आहेत. बोंडवळ,कालवड,कठोरा,हिंगणा या गावांतील नागरिक आणि लहान मुलं सध्या खूप चिंतेत आहेत. कारण या गावातल्या लोकांना अचानक टक्कल पडू लागलंय, गेल्या काही दिवसांपासून गावातल्या लोक केसगळतीने हैराण झालेत. अगदी केसांवरुन हात जरी फिरवला तरी केस गळत असल्याने गावकरी परेशान झाले आहे तसेच येथील लोकांमध्ये घबराटीचं वातावरण पसरलंय. गेल्या पाच ते सहा दिवसातच मोठ्या प्रमाणात केस गळतीमुळं अनेकांना टक्कल पडलंय. या आजाराने गावात शिरकाव केल्यानं गावकरी भयभीत झाले आहेत.
सुरुवातीला डोके खाजवणे, नंतर सरळ केस हातात येणे आणि तिसऱ्या दिवशी चक्क टक्कल पडत असल्याने नागरिकांमध्ये भीतीचे वातावरण आहे. आरोग्य विभागाने या आजाराचं कारण शोधून काढत त्यावर प्रतिबंधात्मक उपाय लवकर काढावेत, अशी येथील नागरिकांची अपेक्षा आहे. त्यामुळेच आता आरोग्य विभागाने या प्रकरणाची सखोल तपासणी सुरु केली आहे. आणि या केस गळती प्रकरणात आता एक मोठी अपडेट समोर आली आहे.
टक्कल पडण्याचे कारण समजले
बुलढाण्याच्या या केस गळती प्रकरणाचा तपास करण्यासाठी ग्रामस्थ वापरात असलेल्या पाण्याचे नमुने तपासणीसाठी पाठवण्यात आले होते. या प्रकरणाची आरोग्य विभागाने तपासणी केली असता एक धक्कादायक बाब समोर आली आहे. येथे वापरण्याच्या पाण्यात नायट्रेटसारखा विषारी घटक मोठ्या प्रमाणात असल्याचं समोर आलं आहे. पाण्याची टीडीएस लेव्हलही भयंकर वाढलेली आहे. नायट्रेटमुळे जीवघेणे आजार जडू शकतात. नागरिकांना टक्कल पडत असल्याच्या तक्रारी समोर आल्यानंतर पाण्याचे नमुने लॅबमध्ये टेस्टिंगसाठी पाठवण्यात आले होते, या पाणी तपासणीचा अहवाल आता समोर आला आहे.
बुलढाणा जिल्ह्यातील शेगाव तालुक्यातील बोंडगावातील पाण्यात नायट्रेटसारखा अत्यंत विषारी घटक मोठ्याप्रमाणावर आढळून आला आहे. पाण्याची टीडीएस लेव्हलही भयंकर वाढली असल्याचं पाण्याच्या तपासणीत उघड झालं आहे, त्यामुळे गावकऱ्यांसाठी हे पाणी विष ठरत आहे. खारबाण पट्ट्यातील या गावात पिण्याच्या पाण्याची वेगळी सोय केलेली आहे, मात्र वापरण्याच्या पाण्यात नायट्रेटसारखा विषारी घटक मोठ्या प्रमाणात आढळल्यामुळे हे पाणी वापराण्यायोग्य नसल्याचं धक्कादायक वास्तव समोर आलं आहे.
